vo Swaziland bis Lesotho

Bevor mir uesi Reis hei choenne vortsetze, hei mir waegem verwirrte Suedafrikaner no ufene Polizeiposte muesse go ae offizielle Rapport abhole (ae Fraesszedu mit Staempu druff). Aber ou das isch aes Erlaebnis gsi.

Witer waer planet gsi quer duer Swaziland i Suede z'fahre. Im Reisefuehrer isch gstange, Swaziland het aes guets usbouts Strassenetz. Mir si ou ufere haube Outobahn bis zum Suedafrikanische Zou cho. Dr Swazi-Zoeuner wo mit sim Heum ufem
Chopf hinger sim Pueutli isch ghocket het ues du gseit bis iz erschte groessere Oertli sig "gravel road" und naer waerdis de besser. Nach ca. 20 Minute Schlagloecher und Schlamm si mir ues einig gsi, dasme das ganz sicher nid Strass cha nennae und das mir das mit uesem Polo nid schaffe. Mir si auso umkehrt und hei uesi Plaen chli gaenderet. Wenigschtens hei mir iz dae Staempu im Pass.

Uf dr Charte hei mir mau gluegt, wo mir statt dessae wei haere fahre und hei dr Ort Amsterdam entdeckt. Das toent no sympathisch hei mir daenkt. Wo aber ufem Waeg dert haere am Strasserand "Crime alert. Do not stop" Schiuder si uftoucht isches ues ploetzlech gar nuemme so wou gsi. Ou z'Amsterdam si mir nume komisch agluegt worde und hei beschlosse so schnaeu wi mueglech witer z'fahre bis mir aentlech wider ane vertrouenserweckende Ort si cho. Dert hei mir de ou aes ganz aes schoens B&B gfunge.

Nachemne chline Abstaecher as Meer isches witergange richtig Drakensberge. Dert hei mir ire haerzige chline Lodge zmitts i dae Baerge uebernachtet und vo dert us mitem Landrover a Tour uebere Sanipass uf Lesotho gmacht. Was mir nid gwuesst hei, hie si d' Strasse no schlaechter aus z'Swaziland. Aber das mau hei mir ja aes entspraechends Fahrzueg und ae guebte Fahrer gha. Fuer di letschte 8 Kolometer steili Haarnadukurve zdueruf hei mir trotzdaem 45 Minute brucht. Dobe si mir de mitere geniale Ussicht uf di naebuverhangeni Hochaebeni, d'Baerglandschaft vo Lesotho und mitemne Gluehwy im hoechste Pub vo Afrika belohnt worde.